حوار مع صديقي المفلس

صديقي: شهاب معلش بما إني فشلت إني اجيب معلومه تدخل دماغي عن افلاس الدول بعد اذنك فهمني افلاس الدول يعني إيه

آآآني: ما انا كنت بحضر لنوت عن كدة. بص بختصار و بساطة عارف الي حصل مع جينرال موتورز الامريكية في الازمة الاقتصادية؟؟

صديقي: آه لما مبقاش في سيوله ولا حركه بيع عندها والحكومه الامريكيه تدخلت لانقاذها

آآآني: هايل ده تعريف الافلاس عند الامريكان والاقتصاد الدولي انك تصل لمرحلة لا تكون لديك القدرة على الاتزام بمواعيد اقساط الديون و لا تتمكن من اعادة تحديد جدولتها. طب و ايه المصيبة في كدة؟  ولا حاجة دي بس بتفرق في البرستيج دوليا

صديقي: هههههههههه

آآآني: بس طبعا بتفقد الدولة الثقة من المستثمرين الخارجيين

صديقي: طيب خدني على قد عقلي

آآآني: الي هما اصل تدفقات رؤس المال الي بتمول الموازنة لان الدول الحلامنتيشي زي مصر معندهاش مصادر دخل فعليه وعايشة على الضرايب و البترول و عوائد قطاعات الخدمات زي السياحة و الكومبيوتروتعتمد سياسة الاقتراض المتتابع يوميا و اسبوعيا و شهريا لتوفير السيولة المحتاجة و تقترض قروض لتغطي مصاريف قروض اخرى و لعبة الطواقي و الكراسي الموسيقية عمليا و بالارقام نحن ابعد ما نكون عن الافلاس الاقتصادي و دي لبانة سياسية ليس اكثر. انا بقالي اسبوعين بقرا التقارير الدقيقة التفصيلية لموازنة البلاد و تقارير خارجية اقتصادية محترمة.

صديقي: 
1- عمله الدوله بتتأثر بنسبه قد إيه
2- الحاله الاقتصاديه للمواطن بتتأثر بنسبه قد إيه
3- هل بيبقى في عقوبات على الدوله
------------------------------------------

آآآني: الفلم كله سياسة يا رفيق جايلك في الكلام

صديقي: ماشي أنا مستمتع جدا بكلامك وبثق فيك كمل يا صديقي

آآآني: العملة بتنهار و الحالة الاقتصادية بتتدهور بس دي مش كل حاجة و احنا ابعد ما نكون عن هذا الوضع. الي عندنا اسمها عجز في الميزان التجاري و ده موجود من زمان. الفرق بس ان بعد الثورة الاستثمارات الاجنبية انسحبت بكثرة من السوق فالاحتياطي النقدي نزل من ٣٧ مليار دولار في يناير قبل الثورة ل ١٥ مليار في شهر ستة الي فات. لان السيولة المتوفرة قلت و معدل الاستيراد زاد بعد الثورة لان اغلب السيولة دي بتروح للوقود "الي بيتسرق كتير طبعا" و الي مدعوم  بنسبة ٨٥٪ لا تصل لمستحقيها و شراء القمح و الغلال و في اخر شهرين لما الدنيا عكت قوي و دخلنا في حالة شبه عصيان مدني مفيش شغل وحال البلد وقف و الامن في الارض و السياحة وقفت زاد معدل العجز في الميزان التجاري من ٧.٨ مليار الى ١٠ مليار دولاراحنا في الطبيعي كل سنة عجز الموازنة عندنا بيكون في حدود ٧٪ الى ٨٪ السنة دي متوقع يوصل ل ١١٪ يعني ٢٠٠ مليار جنيه و هنا بيلعب بتوع السياسة. معلومة لا يعلمها الكثير احنا ماليا و اقتصاديا و ضع ديونا الخارجي افضل من دوله زي تركيا الي بنحلم نوصلها.
كفاية كده علشان صدعتك

صديقي: تمام جدا أنا عارف الكلام ده ومع رفع الدعم بشكل جزئي يعني مثلا على البنزين 95 وعلى الغاز في المصانع الاسمنت ........ الخ

صديقي: اشرح حته تركيا ديه

آآآني: مش هفتي كتير في حتة تركيا علشان مليش علم بيه ابس باختصار انت عارف انهم بقالهم بتاع عشر سنين هيبيضو و يخوشو الاتحاد الاوروبي

صديقي: آه عارف

آآآني: احد اهم الاسباب لرفضهم هو ارتفاع عجز الموازنة عندهم بشكل كبير و ارتفاع عجز الميزان التجاري و ده الموضع مع اليونان الي بسببة الاتحاد الاوروبي كله بيكح تراب. المعدل المنيل عند تركيا ده اسوء من عندنا بحالنا المهبب ده تصدق بقة !! و بالنسبة للدعم مش المطلوب الغائة او تقليله المطلوب اعادة ضبط الية توزيعه.

صديقي: دحنا يا صديقي عايشين في المهلبيه وعندنا سياسيين لو اتوزعو على العالم كفيلين يقومو حرب عالميه 3

آآآني: و ده الي بهاتي فيه و الناس كلها قافشة عليا. بقولهم كل النخبة دي ولعو فيها بجاز سواء اخوان ولا جبهة ولا اي نيلة كلهم بلوظة و لعلمك كل الحروب اشعلها الساسة

صديقي: عارف البلد ديه ممكن تبقى اعظم دوله لو طلعنا احنا الحكم مش أنا وإنت جيلنا هتضرب وهنتخانق بس هنعدلها
عارف لما كنت باعمل بحث عن الحرب العالميه الثانيه الساسه هم من أشعلوا الفتيل

آآآني: دي احد توصياتي في الورقة دي لحل الازمة الراهنة زبل كل النخبة و تصعيد الشباب. قاعدتي في الحياة: لا يجب السماح للماضي ان يفرض على الحاضر مستقبله.
http://mish-ana.blogspot.com/2012/12/blog-post_7733.html
   
صديقي: بس هو احنا بنحلم ؟
يعني تخيل إني اكتشفت منظمات في مصر تعمل ضد التمييز وهي أم التميز ومنظمات تانيه تعيش على الفتنه الطافيه يعني لو مفيش فتنه طائفيه يقفلوا ويقعدوا في البيت وخد من ده كتير.

آآآني: دول موجودين من قبيل الزمان و سيظلو لان كل جسد فيه بكتريا و جراثيم متعايشة فيه. فقط يظهر لها اثر حين ينهار الجهاز المناعي للامة و تنهار روح الوئام.

آآآني: معلومة عالماشي: تعرف ان ايسلند اعلنت افلاسها رسميا في اكتوبر ٢٠٠٨ولسة عايشين عادي

صديقي: هههههههههههه أنت عارف إني كنت فاكر إني افلاس الدوله معناه زي افلاسي كده معيش جنيه في جيبي ديه الصوره اللي وصلتلي من ولاد ....

آآآني: مانا بقولك الفلم كبير و بيتلعب سياسة

آآآني: والأرجنتين كمان من فترة أشهرت افلاسها أكتر من مرة..ودلوقتى من أقوى اقتصادات العالم. الميزة انهم لما بيشهروا افلاسك بيسقطوا كل الديون اللى عليك 

ملحوظة:

بس للتوضيح. الهدف هنا تبسيط المفهوم للمواطن العادي بعيد عن التفاصيل الفنية. ليفهمو الفرق بين الازمة من المفهوم الاقتصادي و اللعب السياسي

كمالة:

- الفرق بين الموازنة العامة للدولة و النظام المصرفي زي الفرق بين مراتك و مرات اخوك بالظبط. مراتك حلالك بلالك و مرات اخوك اخرها تجاملكم في حلة محشي. متدخلوش زيد في عببيد ازمة الموازنة لا علاقة لها من قريب او بعيد بفلوسك فالبنوك.

- بغض النظر عن راي المشايخ بس حسب القواعد الاقتصادية المعمول بها في مصر و العالم قرض البنك الدولي مهم لفتح باب التدفقات النقدية من الدائنين الاخرين لفك زنقة الموازنة. لان احنا دوله السيولة عندنا قائمة علي فكرة الاستدانة المتتابعة يعني بيلبس طواقي لبعض. لحد ما يكون عندنا اقتصاد حقيقي هيفضل ده الوضع.

- الي بيعلق ورى في اخر صف ويقولي بس ده حرام هقوله: لما نكون في دولة بتطبق الشرع يا شيخ نتكلم بما يتوافق معه. نحن الان نخاطب قوم بلغتهم و لنخرج البلاد من الازمة . تطبيق الاقتصاد الشرعي يستلزم تغير المنظومة كلها و ليس الرجال و الافكار و الاليات فقط و هذا يلزمه دهر.

- المشايخ الي عمالة تقول القرض حرام بصراحة علشان دول ناس قاعدين فالضل و مش فارقة معاهم هرتلتهم هتودي على فين و نار الخطء لن تمسهم.

- كما قلت الاقتصاد الشرعي الحلال منظومة كاملة و ليس راي في جزء من السلسلة. لو علم هؤلاء باقي السلسلة لماتو من السكتة الدماغية من كثر ما سيرون من حرام في النظام الاقتصادي. يا تقدم بديل كامل بخطة عمل بمراحل للتطبيق يا تسكت و تسلملي على طائر النهضة.

- اتذكر حين كنت ادرس مادة الاقتصاد و التمويل في المجيستر عند الكفرة الامريكان كنت بقول لصحابي و مراتي هي مادة من الجلدة للجدة خمرة حرام. انا بذاكرها علشان انجح بس و افهم ولاد التيت دول شغالين ازاي.

- في واحد بيقول" دي دعوة للإفلاس بقى ونبتدي على نضافة؟!".  انا سعيد انك سألت السؤال ده:
علي فكرة الارجنتين لما جالهم ريس جديد مجنون من عشر سنين عمل كدة فعلا. كانت ديونهم رهيبة، قلعلهم و قال انا مش دافع و لو عايزين تيجو تحتلونا تعالو. الكلام ده حصل بجد و العملة انهارت و البنوك قفلت بس فعلا اسقطت ديونهم و جدولت لسنوات بعيدة مما ادى الى التحرر من عبأ الديون و النهوض و هم الان من اقوى الاقتصاديات الناشئة. بس دي لمؤخزة حركة عايزة ريس صايع و مستبيع و كل البلد في ضهره.

- انا لا ادعو للافلاس لكن ادعو للكف عن الاستماع لعبط الاعلام والساسة في الاقتصاد

للتفاصيل الوضع الاقتصادي للبلاد اقرا هذا المقال:

و لرايي الشخصي عن الوضع الحالي اقراء هذا المقال:

و ارشح هذا المقال كورقة للخروج بالبلاد من حالة النفق المظلم الحالي: